दिवस मोगरा होतो
रात्र सायली होते ,
तुझिया अस्तित्वाने
श्लोक-शायरी होते।
मी धुनी पेटवत असता
तू यज्ञाचे मंतर गाते ,
मी अलख निरंजन म्हणतो
ते नातीचरामी होते ।
मी दृढनिश्चयी कैलासी
तू भोगावती अवखळशी,
मी सांब सदाशिव होता
तू सती,शाम्भवी होते ।
मी अतिक्षोभी महाकोपी
ब्रह्मांडा भस्म ह्या करतो,
तू राख होऊन येते
देहाग्नी शांत निवविते ।
हे चक्र अनाहत आहे
अनंत कालौघाचे ,
मी पाठ दावी विलासी
तू पाठ भोगां लाविसी ।
मी विनाशभैरवी गातो ,
तू सृजनाचे कूजन होते ,
मी प्रलयगीत संपवताना
तुज प्रणयगीत प्रसवते ।।
विनायक
#vinayaki
#विनायकी
